Ørskog Frivilligsentral, Mental Helse Stordal og Sjøholt DPS arrangerer temamøte om kultur, sjølvhjelp og psykisk helse på Ørskog Samfunnshus i Sjøholt sentrum torsdag 16. april kl 1900.
Møtet er eit ledd i eit sjølvhjelpsprosjekt som Sjøholt DPS har teke initiativ til, og som har kringliggjande kommunar, frivilligsentralar, brukarorganisasjonar og andre frivillige lag og foreiningar som samarbeidspartnarar. Tanken med kvelden er å fokusere på kulturaktivitet og sjølvhjelp som bidrag til trivsel og god psykisk helse, og på kultur som sjølvhjelp. Håpet er på denne måten å "så" idéar og utfordringar som kan bli til handling - og hjelp - for både offentlege instansar, frivillige lag og einskildpersonar i distriktet.
Kultur og psykisk helse
Karin Skjetne og Elin Dromnes frå FRONT Kompetansesenter i Molde vil formidle nokre av sine erfaringar frå arbeid med kultur og psykisk helse. Kompetansesenteret er oppretta av Helse Nordmøre og Romsdal og driv elles mellom anna med arbeidsførebuande tiltak, kurs- og produksjonsverksemd. Karin Skjetne har lang fartstid som ergoterapeut og pedagog med videreutdanning i drama, pedagogikk og aktivitetsvitenskap. Ho har og like lang erfaring med regi, teaterinstruksjon og song, for å nemne noko, ofte retta mot kulturaktivitetar på scene. Elin Dromnes er ein av tre erfaringsmeidarbeidarar ved kompetansesenteret. Desse medarbeidarane har brukarerfaring og jobbar på lik line med dei andre tilsette. Elin, som for tida også er sjukepleiarstudent, har gått musikklina på vidaregåande skule og vore korpsmusikar i heimekommunen Rindal.
Inspirere andre
Elin Dromnes og Karin Skjetne har tre års kulturverkstad-samarbeid i Molde bak seg. Kulturverkstaden blei oppretta som eit fritidstilbod i Molde for unge som slit psykisk og for vener av dei. Her har ein gått saman om å lage kulturprogram for framføring i kulturhus og andre samanhengar. Som prosjektmeidarbeidarar reiser dei to for tida rundt i kommunane i Romsdal og på Nordmøre for å formidle erfaringane sine og inspirere andre til å gjere liknande ting lokalt. No får vi del i det same på sunnmørssida, noko arrangørane vonar kan interessere eit breitt publikum.
På programmet står elles song- og musikkinslag ved unge frå distriktet, informasjon om sjølvhjelp og sjølvhjelpsgrupper, om organisasjonen Mental Helse og det interkommunale dagsenteret Solglytt i Ørskog.
Kontaktperson
Kolbjørn Gjære, Sjøholt distriktspsykiatriske senter (DPS), mobil 92021466.
Program til temamøtet (pdf).