Statsråd Anne-Grete Strøm-Erichsen på førjulsbesøk på Volda sjukehus ble møtt av Lucia-opptog og mange journalistar.
Det var eit innhaldsrikt program som stod på dagsordenen når helse- og omsorgsminister Anne-Grete Strøm-Erichsen vitja sjukehusa på Sunnmøre i går. Fleire frå leiinga i Helse Sunnmøre og Helse Midt-Norge var tilstades saman med tillitsvalte og andre inviterte.
Adm. direktør i HMN, Gunnar Bovim ynskte ministeren velkomen og sa nokre ord om status i vår helseregion. Styreleiar i HSM, Marthe Styve Holte poengterte det kvalitetsfokuset ein har på tenestene i helseføretaket på Sunnmøre. Ho nytte og høvet til å rose den klare leiinga Helse Midt-Norge utøver.
Adm.direktør Astrid J. Eidsvik i HSM supplerte med kvalitetsfokuset i sin presentasjon. Ho la vekt på dei fire kvalitetsindikatorane helseføretaket har spesielt fokus på; fristbrot, ventetid, korridorpasientar og epikrisetid. Vidare orienterte Eidsvik om Volda sjukehus. Helse Sunnmøre har satsa mykje på lokalsjukehuset på søre Sunnmøre.
–Vi er avhengige av eit velfungerande lokalsjukehus, og kvalitet skal ligge i botnen for alle våre tenestar, sa Eidsvik. Etter ein presentasjon om fødeavdelinga i Volda viste nestleiar på Kvinneklinikken Idunn Myklebust helse- og omsorgsministeren rundt på avdelinga.
Seinare på dagen ynskte Eidsvik Anne-Grete Strøm-Erichsen velkomen til sjukehuset på nordre del av Sunnmøre. Ålesund sjukehus som er det nest største sjukehuset i Helse Midt-Norge samarbeidar godt med dei andre sjukehusa i fylket.
Klinikksjef Torstein Hole orienterte om geriatritilbodet i Helse Sunnmøre – status og framtidige utfordringar. Kommuneoverlege Bjørn Martin Aasen informerte gjestane om samarbeidsprosjektet som Helse Sunnmøre, Herøy og Sande kommune samarbeidar om. Siste post under besøket var omvising alderspsykiatrisk seksjon ved avdelingssjef Regina Steinberger og seksjonsleiar Nils Arne Skagøy.
Etter omvinsingar og samtaler med både leiing og tillitsvalte gav ministeren uttrykk for at ho har inntrykk av at Helse Sunnmøre er eit veldrive helseføretak.
Leiinga i både Helse Midt-Norge og Helse Sunnmøre var med på omvisinga
på sjukehuset i Volda. Frå venstre; nestleiar på kvinneklinikken i HSM, Idunn Myklebust, adm.direktør i HMN, Gunnar Bovim, direktør for samhandling i Midt-Norge, Daniel Haga og adm.direktør i HSM, Astrid J. Eidsvik.
Anne-Grete Strøm-Erichsen har ikkje tidlegare vitja Ålesund- og Volda sjukehus, og la inn desse besøka når ho likevel skulle arrangere høyringsmøte i Ålesund. Tema for det opne høyringsmøtet var geriatri og eldreomsorg. Under møtet viste helse- og omsorgsministeren til samarbeidsprosjektet innan geriatri i Helse Sunnmøre, eit nytenkjande prosjekt som kan vise til mange ulike samarbeidsløysingar mellom første- og andrelinetenesta.