Avdelingssjef ved kreftavdelinga i Helse Sunnmøre, Jorunn Bøyum er kåra til årets sjukepleiar av sjukepleiarforbundet i Møre og Romsdal. Prisen vart delt ut under markeringa av den internasjonale sjukepleiardagen på Høgskolen i Ålesund 14.mai.
 |
| Årets sjukepleiar i Møre og Romsdal, Jorunn Bøyum. |
Bøyum vart nominert av det ho beskriver som ein ung og entusiastisk sjukepleiar på sengeposten ved kreftavdelinga i Helse Sunnmøre. Prisen vil ho dele med alle tilsette i avdelinga.
Juryen gav følgjande grunngjeving for prisutdelinga:
”Jorunn Bøyum er ein tydeleg, modig, stolt sjukepleiar som syner stor fagleg kunnskap og forståing. Ho har eit ekte engasjement for pasient, pårørande og medarbeidarar. Jorunn Bøyum har vore med å bygd opp kreftavdelinga ved Helse Sunnmøre til å bli eit godt tilbod for kreftpasientar i vårt fylke. Kvalitet, respekt, effektivitet, framtidsretta arbeid og tillit er styrande element i hennar leiarstil. Jorunn Bøyum er ein inspirerande, uredd og dyktig avdelingsleiar med klar sjukepleiaridentitet, noko som bidrar til å utvikle medarbeidarar og dermed sjukepleiartenesta. Ho er eit flott førebilde både som sjukepleiar, leiar og menneske”.
- Det rører meg veldig å bli nominert av eigne tilsette, seier ein beæra og audmjuk prisvinnar.