Vegsund distriktspsykiatriske senter (DPS)

Senteret har planlagde opphald etter søknad frå ein tilvisar.

Pasientane kjem både direkte frå heimen og frå avdelingar ved sjukehus. Ved overføring frå andre avdelingar, kan Vegsund vere ein “mellomstasjon” for at pasienten skal bli betre før heimreise.

Vi gir ikkje strakshjelp. Det gjer derimot dei psykiatriske seksjonane ved Ålesund sjukehus.

Hit kjem pasientar med alle slags psykiske tilstandar/sjukdommar, og senteret har hovudsakleg frivillige opphald. Opphaldslengda er vanlegvis  2-6 veker.

Senteret er delt slik:
Post A med 6 behandlingsplassar.
Post B med 13 behandlingsplassar.

Fasilitetar:

• Alle pasientar har einerom.
• Nokre må dele bad med ein medpasient.
• Vi har ikkje røykjerom. Røyking skjer på tilviste plassar utandørs.
• Senteret har også fleire aktivitetsrom, stove/allrom på kvar post
• Vi har eit fint uteområde.
• Vi tilbyr utlån av syklar, ski og anna fritidsutstyr.
• Senteret har tilgjenge til båt med påhengsmotor. 

Kva er viktig for deg å ta med?

• Medisinen du bruker til dagleg i orginal emballasje (medisinøskjene), ikkje dosett.
• Skriftleg oversikt over medisin du bruker (frå fastlegen eller heimesjukepleia/psykiatritenesta).
• Kopi av individuell plan dersom du har det.
• Klede og fottøy som passar til turgåing og til fysisk aktivitet innandørs. Du kan nytte vaskemaskin og tørketrommel i avdelinga. 
• Bøker, handarbeid, musikk og liknande. Du har fritid om kvelden og i helgane.
• Vekkjarklokke. 

Kvar ligg Vegsund DPS?

 Sjå gule sider.

Senteret er merkt med raud markør.

Drosje/pasienttransport

Dersom du på grunn av helsa di ikkje kan nytte rutegåande transport til sjukehuset, kan du be om rekvisisjon til pasienttransport hos fastlegen eller behandlaren din. Du finn meir informasjon om dette på pasienttransport.no.

Korleis søkje til senteret? 

Du tek kontakt med lege, psykolog eller annan behandlar som skriv søknad for deg.
Ho/han (tilvisar) sender søknaden til Vegsund distriktspsykiatriske senter, 6020  ÅLESUND

Søknaden bør innehalde:

• Bakgrunn: Samlivsstatus, ev. born, bustad, utdanning/arbeid/trygd.
• Aktuell sjukdom og behandling.
• Mål for opphaldet.
• Ønske om kor lenge opphaldet skal vare.
• Medikamentopplysningar: Desse må vere presise, fullstendige og oppdaterte!
  

 

Kva skjer vidare med søknaden ?

• Registrering ved Vegsund DPS.
• Vurdering av behov og mogleg tilbod.
• Eventuelt poliklinisk forvernsamtale.
  

Alternative tilbakemeldingar :

• Tildeling av opphald: Brev til pasient og tilvisar.
• Avslag: Brev med grunngjeving til tilvisar og pasient.
• Dersom søknaden er ufullstendig eller uklar, sender vi førespurnad til tilvisar om tilleggsopplysningar.

Dersom du har fått tilbod om opphald hos oss, og ikkje ønskjer dette, ringjer du og gir melding om det på telefon 70 10 67 60.

Brosjyre

Brosjyrane til Helse Sunnmøre er lagde ut i pdf-format.

Dersom du ikkje har Acrobat Reader kan du laste det ned gratis her.

Brosjyre om Vegsund DPS.

Vi handterer psykiske lidingar som til dømes:

• angstlidingar
  
• stemningslidingar
  
• psykosar
  
• personlegdomsforstyrringar
  
• posttraumatiske stresslidingar
  
• spiseforstyrringar
  
• rusproblem
  
• speleavhengigheit
  
• krisereaksjonar
  
• tilpassingsforstyrringar
  

Du kan finne meir generell informasjon om psykiske lidingar her:

Helsebiblioteket

Helsedirektoratet

Innkomst i avdelinga

Når du kjem til avdelinga, vil du bli teken imot av ein sjukepleiar eller hjelpepleiar. Du blir vist rommet ditt, og du får tilbod om ei omvisning i avdelinga. Du får vite at der er ein informasjonsperm om avdelinga.  Miljøpersonale vil prøve å svare på spørsmål du har.

Pasientrom Vegsund DPS	Fellesrom Vegsund DPS

Du får ein innkomstsamtale med ein behandlar (lege eller psykolog) og ein frå miljøpersonalet ein av dei første dagane.. Ofte skjer dette den første dagen. Her snakkar vi om årsaka til innlegginga, og om mål og planar for opphaldet.

Behandlingstilbodet

Vi har eit samansett behandlingstilbod. Dei ulike faggruppene samarbeider med deg for å oppnå best mogleg resultat for deg.

Alle pasientar får  behandlingsansvarleg lege eller psykolog, kontaktsjukepleiar og miljøkontakt. Ditt behandlingstilbod blir utarbeidd i samråd med deg og medlemmene i teamet. Du får tilbod om samtalar med behandlar og miljøpersonale.

Vi har eit  program som gjeld for alle pasientar i avdelinga. Dette har vi oppskrive på ein plan for veka. Det er tilbod som vi meiner er nyttige for mange pasientar med ulike tilstandar.

Behandling i gruppe	Biljard i hallen.	Frå terrassen og uteområdet

Vi tilbyr mellom anna:

• Rørslegruppe
• Avspenningsgruppe
• Turar ut (fjellturar, båtturar, turar i skog og mark med meir)
• Individuelt opplegg for meistring
• Aktivitetsavdeling
• Gruppeterapi
• Humortime
• Undervisning
• Diverse kurs        
  

Dette får du vite meir om når du kjem til avdelinga. Dersom du har andre avtalar, tek du dette opp med kontaktpersonen din på førehand. Vekeplanen kan spesialtilpassast for deg.

Vi ser det som ein føresetnad at du følgjer behandlingsopplegget for å få nytte av opphaldet.

Permisjon

Etter vår erfaring er det nyttig for mange pasientar å dra heim på permisjon. Du vert oppfordra til å dra heim av og til, for å prøve ut korleis det fungerer heime.

Samarbeid med pårørande

Ofte kan det vere eit ønske om å kalle inn nokon av dine næraste til ein felles samtale. Dette kan vere eit ønske frå både deg, dine næraste og oss. Alt skjer i samråd med deg.  Det kan til dømes vere nyttig å informere dine næraste om planar etter utskrivinga, eller å få informasjon som er avgjerande for vurdering av diagnose.

Opphaldslengd

Kor lenge du skal vere på Vegsund, er avhengig av målet for opphaldet ditt. Til vanleg  er opphaldslengda mellom 2 og 6 veker. Utskrivingsdato får du vite før innlegginga (i svarbrev) eller når du kjem til Vegsund.

Ulike opphaldstypar

Det er viktig at du, dine pårørande og vi som arbeider her, ser likt på kvifor du er innlagd, og kva vi skal gjere under opphaldet.

Vurderingsopphald (3–6 veker) der vi samlar opplysningar om plagene dine og vurderer dei i høve til:

• Diagnose
• Framtidsutsikter/prognose
• Behandlingsval

Behandlingsopphald (2–4 veker):

• Stabilisering: Med dette meiner vi alle tiltak: medikament, samtalar, aktivitetar og liknande som gjer symptom ved til dømes angst, depresjon og psykose lettare.
• Rehabilitering: Med dette meiner vi tiltak og tilrettelegging som gjer at du kan styre økonomien din, at du lettare finn deg til rette i bustaden din, at forholdet ditt til familie, venner og anna sosialt nettverk fungerer, og at du har omsorg for deg sjølv.
• Informasjon og opplæring: Dette tiltaket tek sikte på at du skal bli flinkare til å meistre plagene dine.
• Aktivisering/motivering: Dette skal støtte og motivere deg til å drive fysisk aktivitet, til å vere sosial og kreativ, og til å gjennomføre eit behandlingsopplegg som du i utgangspunktet kanskje ikkje føler for.

 
Alle opphald har innslag av alt dette, i større eller mindre grad. Men ofte vil ein av desse opphaldstypane dominere.

Kriseseng

I ein avgrensa periode etter utskriving kan det avtalast kriseseng.

Husreglar

Brot på husreglane kan føre til utskriving.

Utreise

Før utskriving har du ein samtale med behandlingsansvarleg og kontaktsjukepleiar. Fokus blir kva nytte du har hatt av opphaldet, og utfordringar etter utreise. Du får med deg ei oversikt over  medisin du har no, oversikt over oppfølging og eventuelt resept på ny medisin som du har starta med i avdelinga. Dersom du ikkje har ein individuell plan, og ønskjer å få det, kan vi hjelpe deg å starte dette arbeidet.

Før utreise kan det vere aktuelt å ha eit samarbeidsmøte mellom deg, oss, det kommunale hjelpeapparatet ditt, og eventuelt andre for å planleggje heimesituasjonen. Saman med deg førebur vi kva saker vi vil ta opp på møtet. Kommunen og andre kan også kome med innspel om kva som er viktig å snakke om. Dette blir teke opp viss du samtykkjer. Dersom du ikkje har oppfølging frå kommunen eller andre aktuelle hjelpeinstansar (f.eks. psykiatrisk poliklinikk), og du synest du treng det, kan vi hjelpe med å formidle kontakt.

Dersom du har behov for det, kan du bruke eit av tilboda som Vegsund DPS har etter utskriving. 

Oppfølging etter utreise

Ved senteret oppheld du deg nokre veker, men det er heime du er mesteparten av tida. Etter utskriving kan det vere behov for vidare oppfølging frå Vegsund DPS i kortare eller lengre tid. Det er heller ikkjje alltid det beste tilbodet å vere døgnpasient. For mange kan det i ein periode vere aktuelt å få meir hjelp og støtte i heimesituasjonen. I den samanheng kan vi tilby tenester frå Vegsund DPS, i samarbeid med pasient og førstelinjetenesta.

Tilbod utan innlegging

• Ettervernsgruppe.
• Polikliniske samtalar etter utskriving med for eksempel lege, psykolog, fysioterapeut eller sjukepleiar.
• Ambulante tenester. Oppfølging av pasientar heime etter avtale med førstelinjetenesta. Dette kan vere til dømes samtalar med pasient og familie, rettleiing til  hjelpeapparat, deltaking i ansvarsgruppemøte med meir.
• KID-kurs (kurs for deprimerte).

Med  ordet oppfølging meiner vi altså den samla hjelpa du får over tid hos ein eller fleire av desse instansane i den tida du bur heime:

Mange pasientar opplever i periodar forverring av plagene sine. Oppfølging tek sikte på å hjelpe deg også i desse periodane. Ta difor kontakt med dei instansane som følgjer deg opp når du kjenner at det røyner på.

Du finn generell informasjon om utgreiing og behandling av psykiske lidingar på desse nettstadene:

www.helsebiblioteket.no

www.helsedirektoratet.no/psykiskhelse

Depresjonsmeistring

01.10.2010

KID - kurs i meistring av depresjon hausten 2010. Kurset er utarbeidd for vaksne som i periodar kjenner seg nedstemt på ein slik måte at det går ut over evna til å fungere og kvaliteten på livet. Kursdeltakarane kan tilvisast til kurset frå fastlegen sin ..